حكاية المعلم

 

حكاية المعلم

المشهد الأول ـ المعلم وسونيا

 

 

q       المعلم: يا خرابى ع الجمال اللى يلطش العقل، يا أرض أحفظى ما عليكى.

 

·        سونيا حلبسة: عيب يا معلم، ده أنا أد عيالك.

 

q       المعلم: يا بت يا هبلة عيال أيه وبتاع أيه، دي المسائل لما توصل للحب يبقى مافيهاش كبير وصغير، طب أيه رأيك أن الكبير بيبقى أحسن من الصوغيرين، ده يا بت زى ما بيقولو الدهن فى العتاقى، والراجل ما يعبهوش حاجة إلا جيبو، وأنا من الناحية دي ح أهننك ونزنزك عل الآخر، بس أنتى طوعينى وحتكسبى البريمو، قلتى أيه.

 

·        سونيا حلبسة: قلت لا إله إلا الله، يفتح الله يا معلم، ليه هو أنا أطسيت فى نظرى، والا يعنى قالولك أنى أطسيت فى نظرى.

 

q       المعلم : سلامة نظرك، وسلامة عينيكى القتالة دول، أموت أنا فى المهلبية.

 

·        سونيا حلبسة : أهيهههههههيي، ما كانش يتعز يا معلم، ما عندناش مهلبية، خولص .. خلاص .. بحه.

 

q       المعلم : طب عندكم رز بلبن، أهو حلو وطرى عل القلب، أصل حاكم أنا بموت فى الحاجات اللى تطرى القلب، آه يا قلبى.

 

·        سونيا حلبسة : سلامة قلبك يا معلم، عايز زقة .. أههههههههههههييي.

 

q       المعلم : يا وعدى على الضحكة اللى تودى اللومان. ما تكبرى عقلك وخلينا نتلم على بعض، وأنا ح نغنغك عل الآخر، وأبسطك أخر إنبساط، بس أنتِ وافقى وح تشوفى العز وأكل الوز.

 

·        سونيا حلبسة: بشرط.

 

q       المعلم : أُومرى وأنا أنفز، دهب .. الماز .. ياقوت .. اللى أنتى عايزه، أنا وما أملك تحت أمرك.

 

·        سونيا حلبسة : لا، يا خويا، فلوسك دي ح أخودها كده .. والا كده، بس شرطي اللى أنا عايزاك تنفزهولي هو انك تطلق الولية القرشانة مراتك.

 

q       المعلم : تقصدى بهانة، لا يا سونيا، دى أم العيال، وبعدين دى متحالة عالمعاش من زمان، ما عدتش طايل منها لا أبيض ولا أسود، وشها يقرف ويجيب الغم والهم، أعوز بالله، أهى خليها فى بيتها كافية خيرها شرها، وتربى العيال.

 

·        سونيا حلبسة : يا خراشي من الكلام اللي يعل القلب، تربى مين يا معلم ؟ دول العيال بسلامتهم رجالة، والبنات أتجوزو وشبعوا جواز.

 

q       المعلم : طيب، وأنتى أيه اللى مدايك منها، ماهى متلقحة فى بيتها لا بتهش ولا بتنش، عاملة زى أمبوبة البوتغاز الفاضية.

 

·       سونيا حلبسة : لا، يا معلم أنا ماتجوزش على دُرة، أنا زى الفريك، ما أحبش شريك، واللى أولو شرط أخرو نور، تطلق القرشانة نتجوز على سنة الله ورسولو، مش عايز يبقى يا دار ما دخلك شر، أهو أنا فى حالى وأنت فى حالك، قلت أيه يا معلم.

 

q       المعلم : قلت لا إله الا الله، طيب علشان لهطة القشطة دى أطلق أبوها كمان.

 

*****

 

المشهد الثاني ـ المعلم وبهانة

 

q       المعلم: مساء الخير يا ست الكل.

 

·        بهانة (زوجة المعلم): يسعد مساك يا سيد الرجالة، حمد الله على السلامة ياخويا، ده أنا جهزتلك المية السخنة بالملح عشان تحط رجليك فيها، تلاقيك يا عنيه تعبان، ما أنت يا عينى بتشقى طول اليوم، يا عيني عليك يا كبدي من الصبح لحد آخر النهار فى الوكالة، ربنا يسترها معاك يا سيد المعلمين كلهم.

 

q       المعلم: ربنا يخليكى ويسعدك يا بهانة، شوفى أنا جبتلك أيه، هدية حلوة تستاهل جمالك اللى ما وردش على حد.

[يخرج المعلم من جيب جلبابه علبة مصوغات من القطيفة الحمراء، ويقدمها إلى بهانة]

 

·        بهانة: هديه أيه يا سيد المعلمين، ده خيرك مغرقنى، أنا مش محتاجه أيتوها حاجه، أنت كثر خيرك مش منقصنى حاجة ولا مخلينى أعوز حاجه، ده أنا مش عايزه من الدنيا دي إلاّ دخلتك عليا يا سيد المعلمين.

 

q       المعلم : لا يا بهانه، ده أنتِ تستاهلى كل الخير يا وش الخير، فاكرة ده أنا من أول ما أتجوزتك وطاقة القدر أتفتحتلي، والدنيا أدتنى بوشها الحلو، وأدينى بقيت أكبر معلمين النحاس فى شبرا البلد بحالها.

 

·        بهانة : يوه يا معلم، أنت لسة فاكر، دى أيام ما خلاص أحنا دفنها، وماعادش تعود بإذن ربنا المعبود، دعوة ولية فى ساعة مغربية.

 

q       المعلم : طلعي الغوايش من العلبة يا وش السعد وحطيهم على درعاتك المربربة دى خليها تلعلط بنور الدهب.

 

·        بهانة : والله مالو لازمة، بس كلفت نفسك يا معلم، ده الدهب عندى بالكوم ح البسو فين يا حسرة، ما هو أيام الشبرقة راحت يامعلم.

 

q       المعلم : فشر، مين اللى قال كده، ده أنتى بهانة مالكة الجمال كولهو، ده أجدعها ست فى مصر ما تتقلش بظرفك.

 

·        بهانة : الله يا معلم، ما بلاش، ما تكسفنيش بقه، روح ربنا يكرمك ويجبر بخاطرك، خلاص ربنا يحسن الخاتمة، هو أحنا حا ناخد زمنا وزمن غيرنا، البركة بقه فى العيال، ربنا يفرحك بيهم، إلا حقه يا سيد المعلمين أنت مش ناوى تجوزهم زى ما جوزت أخواتهم البنات والا أيه.

 

q       المعلم : مش لما أتجوز أنا الأول.

 

·        بهانة : يقطعك يا معلم، الله يجازى أشطانك، ده أنت دايماً كده بتحب الهزار حتى فى ساعة الجد، ياخويا دول عيالك كبروا وحقهم يتأهلو بقه، لأحسن يمشو فى الغلط والسكة البطالة، والا تغويهم واحدة من أياهم.

 

q       المعلم: أنا باتكلم جد ياست الكل، أنا ناوي أتجوز.

 

·        بهانة: ما تبطل هزار يا معلم، لأحسن الفار أبتدأ يلعب فى عبي.

 

q       المعلم: هزار أيه، أنا بجد ناويت على الجواز، ما أنتى عارفة الراجل مننا ليه متطلباتو فى الذى منو، وأنتى ربنا يديلك طولة العمر بقه ما عدتيش زى زمان، الرومازيزم عمال بينهش فى جثتك، والبتاع اللى بيدوس على دمك ده ..

 

·        بهانة: اسمو ضغط الدم يا خويا.

 

q       المعلم: وأنا والحمد لله، واسم النبى حارسنى، زى ما أنتى شايفة لسه بعافيتى، أتقولش هو شوية الفتق والزمكة اللى بتنقح عليا مرة مرة، وده كلو مقدور عليه، لكن فى المسائل التانيه لسه صاغ سليم وحياتك، ولازمنى واحدة تراعيني، مش كده والا آيه.

 

·        بهانة: ده باينك بتتكلم جد يا معلم، الحكاية يعنى مش هزار.

 

q       المعلم: جد الجد كمان.

 

·        بهانة: ومين بنت أبوها دى اللى ناوى تتجوزها يا معلم.

 

q       المعلم: البت سونيا حلبسة، بنت حلال وغلبانة وأهو أكسب فيها وفى أهلها ثواب، أنشلهم من الغلب اللى همه فيه.

 

·        بهانة: لا والله فيك الخير يا معلم، بقه ياراجل يا دون، يا واطى، يا عرة الرجالة، يا شايب ياعايب، بعد العشرة دى كلها وبعد ما بقالك أحفاد، جاي تقول عايز تتجوز، بطلو ده وأسمعو ده. ده أنا من الصبح قاعدة بسمعك وفاكرة انك بتهزر، أتريك بتتكلم بجد وعايز تتجوز مفعوصة الرقبة اللى ما تتسماش، بنت زيزى هشك بشك، ما هو على رأي المثل أقلب الجرة على فمها تطلع البنت لأمها، طبعاً ماهى أمها طول عمرها خطافة رجالة، مش أتجوزت سعيد السروجى من على مراتو الست الطيبة خدوجه الهنتوش، ولما ربنا افتكروا وغار فى ستين داهية، خطفت خليل أبو شامه من على مراتو زينب المدب، ما هى متعودة، مش كانت تشتغل فى الكرخانات وترقص للرجالة وتعمل البطال قبل ما تيجى لحارتنا وتعيش فيها وادور على رجالتها، وأهى بنتها ماشية فى نفس سكة أمها، بس آيه، ده بعدهم .. وألف بعدهم، ده أنا لا زى خدوجه الهنتوش ولا زى زينب المدب، ده أنا بهانه والآجل على الله، مش أنا اللى أتاخد لحم واترمى عظم، ده أنا حا أوريك شغلك يا أبن هنونة الغسالة، والا أنت نسيت أصلك يا دون يا أبن الحيزبون، ده لولا أبويا اللى نطقك وأدالك من مالو، ونشلك من بيع الروبابكيا  كان زمانك مرمى جنب حيطة بتشخ عليك الكلاب  يا واطى.

 

q       المعلم: الله ، الله ، أيه ده يا بهانه، عيب كده، ده ما يصحش الكلام الشلق ده، ده أنا المعلم زينهم أكبر معلمين النحاس ..

 

·        بهانة: معلم أيه يا كروديا، أتكونش صدقت أنك معلم بحق وحقيق، الكلام ده تروح تقولو على القهوة للناس اللى ما يعرفوكش على حقيقتك ويعرفو أصلك الواطى، ده أنا خابزاك على أيديا دول من أيام ما كُنت تسرح فى الشوارع وتزق عربية الروبابيكيا وتجعر بأعلى صوتك "روبابيكييييييييا"، والا أنت ناسى يا سي شيء لله معلم، لكن أنا حا أوريك يا أبن بسلامتها هنونة الغسالة، ولا أنت ناسى أن أمك كانت بتسرح على البيوت عشان تغسل الهدوم بشلن وتعريفة.

 

q       المعلم: ما بلاش سيرة أمى بقه، عيب كده يا بهانه، هو أنا غلطت والا يعنى غلطت، أنا كل اللى قولتو أنى عايز أتجوز بالحلال، يعنى غلطت فى البخارى يا خي، ماهو كل الناس بتتجوز على سنة الله ورسولو، وبعدين الشرع محلل أربعة، يعنى أنا ما جبتش حاجة من عندي، إذا كان ربنا بنفسو بيقول مثنى وثلاثة وأربعة، يعنى أنا ح أفهم أحسن من ربنا، لا حول الله يا رب على ده ظُلم، ليه لازمة الغلط والكلام اللى يسم البدن ده.

 

·        بهانة: سم لما يهرى مصارينك يا أبن الغسالة، وربنا المعبود لو جبت الكلام ده على لسانك مرة تانية لأنا مرجعاك زى ما كنت، تسرح فى الشوارع بالروبابيكيا يا بتاع الروبابيكيا، أنت ناسى أن أنا برضو كنت عارفة أن صاحب الأصل الواطى بيرجع لأصلو وزى المثل ما بيقول " كسكسكلو يرجع لأصلو "، وعشان كده عملت حسابى وكتبت كل حاجة بأسمى حتى البيت اللى أنت قاعد فيه ده مكتوب باسمى، وأنت ماليكش إلا الهدوم اللى على جثتك المنحسة دي.

 

q       المعلم: خلاص يا بهانة فُضيها سيرة، ويا دار ما دخلك شر، يلعن أبو الجواز، ويلعن سلسافيل سونيا حلبيسه، هو فيه فى الدنيا أحلى منك يا جميل، ما تيجيبي بوسة.

 

·        بهانة (ضاحكة): لما تشوف حلمة ودنك يا بعيد، أما صحيح صنف يخاف ما يختشيش.

 

*****

 

العودة للصفحة الرئيسية

كان ياما كان كان ياما كان كان ياما كان كان ياما كان كان ياما كان كان ياما كان كان ياما كان كان ياما كان كان ياما كان

Advertisements

Posted on December 1, 2008, in كتابات في الحب. Bookmark the permalink. Leave a comment.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s

%d bloggers like this: